KINSA NGA JESUS ANG IMONG IWALI?

KINSA NGA JESUS ANG IMONG IWALI?
Igsoon Albert Gran

2 Corinto 11:4 ug Roma 16:25

2 Corinto 11:1-4

1 ¶ Kon makaantus pa lang unta kamo uban kanako sa usa ka diyutayng binoang! Apan antusa ninyo kini uban kanako!
2  Kay ako may pagbati sa diosnong pagpangabubho alang kaninyo, sanglit kamo ugod ako na man nga gikasaad nga maasawa sa iyang usa lamang ka bana, nga mao si Cristo, aron ikahatag ko kamo ingon nga birhin nga ulay.
3  Apan nahadlok ako nga maingon nga si Eva hinglimbongan sa bitin pinaagi sa lipatlipat niini, ang inyong mga panghunahuna pagapahisalaagon gikan sa maminatud-on ug putli nga pagkamahinalaron kang Cristo. 

Nganong si Pablo nakasulat man niining maong paagi? Sa bersikulo 2, siya nagsulat "Kay ako may pagbati sa diosnong pagpangabubho alang kaninyo" Aduna siya'y usa ka talagsaong gugma alang kanila. Siya usab miingon 1 Corinto 4:15.."  Kay ako nahimong inyong amahan diha kang Cristo Jesus pinaagi sa Maayong Balita."Siya nag-isip kanila nga mga anak. Siya nagabubho tungod kay sya naglantaw kanila ug nakakita sa mga panghitabo nga wala niya ganahi. Si Pablo nagpalig-on kanila diha sa kamatuoran ug nagsugod sa paglantaw nga adunay pipila ka mga butang nga dili tinuod. Siya nahadlok nga adunay moadto kanila ug magasulti kanila ug maghisgot nga ang iyang gitudlo dili insakto ug dayon sila manghitibulaag.

Aduna pa bay laing usa pa ka Jesu- Cristo diha sa Biblia? Aduna lamay usa ka Jesus apan siya dunay managlahi-lahi nga buluhaton, ang buluhaton sa yuta ug sa langit.Si Pablo nag-ingon nga adunay moanha kaninyo ug magawali kang Jesus apan dunay bahin nga sayop sa Jesus nga ilang giwali. Ang Jesus nga ilang giwali lahi sa Jesus nga giwali ni apostol Pablo.

Roma 16:25

25 ¶ Ngadto kaniya nga arang makapalig-on kaninyo sumala sa Maayong Balita nga akong ginamantala ug sa pagwali mahitungod kang Jesu-Cristo, sumala sa pagpadayag sa tinagoan nga gitipigan sa hilum sulod sa tag-as nga mga katuigan 

Si Pablo nagwali kang Jesus sumala sa pinadayag sa tinago; kini mao ang Jesus sa Iyang langitnong buluhaton. Mao kini ang Jesus diin maoy igasangyaw niining panahon sa grasya.

SI JESUS SUMALA SA PROPESIYA O PANAGNA

Juan 1:29-31

29 ¶ Ug sa pagkasunod nga adlaw iyang nakita si Jesus nga nagpaingon kaniya, ug siya miingon, "Tan-awa, mao kana ang Cordero sa Dios, nga magakuha sa sala sa kalibutan!
30  Mao kana siya ang gihisgutan ko sa akong pag-ingon, `Sunod kanako moanhi ang usa ka tawo nga gikapahimutang na unahan kanako, kay siya una pa man kanako.'
31  Ug ako gayud gani wala man masayud kaniya; mao lamang nga mianhi ako nga nagpangbautismo sa tubig aron ikapadayag siya ngadto sa Israel." 

Sa bersikulo 31, si Juan Bautista, pinaagi sa pagbautismo, nagapakita kang Jesus sa Israel. Si Jesu-Cristo mianhi dinhi sa kalibutan aron sa pagwali sa maayong balita sa gingharian diin maoy gitagna sa mga propeta. Si Jesu-Cristo gitanyag ingon nga Hari, Pari ug Propeta diha sa iyang buluhaton dinhi sa yuta.

Human sa pagkabanhaw ni Jesus:

Buhat 2:36

36  Busa, ang tibuok banay sa Israel kinahanglan masayud sa tininuod gayud nga sa Dios si Jesus gihimong Ginoo ug Cristo, ang Jesus nga inyong gilansang sa krus." 

Si Pedro nagsulti kanila unsay kahulugan ni Kristo alang kanila human sa iyang kamatayon ug pagkabanhaw, diin Siya ang Ginoo ug Kristo. Kini samang Jesus sumala sa panagna apan atong makaplagan nga adunay dugang nga Balaang Esperitu nianang mensahe nga gikawali. Kanang maong mensahe samang bahin gihapon niadtong gitagna sa mga propeta.

Buhat 3:19-20

19  Busa, paghinulsol kamo, ug pamalik na kamo kaniya, aron mapala ang inyong mga sala, aron ang mga panahon sa kahayahay magaabut gikan sa atubangan sa Ginoo 20  ug aron iyang ipadala si Jesus, ang Cristo nga gitagana alang kaninyo, 

Si Pedro nagsulti nga kon sila maghinulsol si Jesus mobalik. Kanang Jesus nga mobalik unya mao ang Jesus nga gikawali ngadto kanila; mao kanang Jesus sumala sa mga panagna.

Roma 15:8

8  Kay sultihan ko kamo nga si Cristo nahimong sulogoon ngadto sa mga may sirkunsisyon aron sa pagpakita sa pagkamatinuoron sa Dios, aron sa pagmatuod sa mga saad nga gihatag ngadto sa mga patriarca, 

Bisan pa si Pablo nagadiklarar nga sa dihang si Jesus mianhi sa kalibutan siya nagapamatuod sa mga saad nga gihimo sa mga Amahan, diin ang ipasabut nga Siya mianhi sumala sa mga panagna.

SI JESUS SUMALA SA TINAGO

Si Pablo nagwali sa mga butang mahitungod kang Jesus nga siya lamang ang nasayud o nakahibalo. ( Tan-awa ang Efeso 3). Sa Buhat 7, si Jesus anadam na unta sa pagbalik aron sa paghukom apan wala niya kana gihimo, tungod kay Siya mibalik ug nagpakita kang Pablo sa dalan sa Damascus aron sa pagluwas kang Saulo nga Tarsus (Pablo), ug nagsugod sa pagsulti kaniya labut sa mga butang nga wala sa Dios gipahibalo kaniadto.

Kini lahi nga Jesus sa paagi diin ang Mensahe nga giwali ni Pablo lahi sumala sa gihatag kaniya gikan sa binanhaw nga Jesus: ang maayong balita sa grasya sa Dios, ang maayong balita nga Iya sa walay-sirkunsisyon.

1 Corinto 15:1-4

1 ¶ Mga igsoon, buot kong ipahinumdom kaninyo ang Maayong Balita nga akong giwali kaninyo, nga inyong gipanagdawat, nga niini nanagbarug kamo karon,
2  ug nga pinaagi niini kamo ginaluwas kon inyo kining kuptan pag-ayo-- gawas kon taphaw ra ang inyong pagtoo.
3  Kay gihatag ko kaninyo ingon nga labing hinungdanon ang nadawat ko ra usab, nga si Cristo namatay tungod sa atong mga sala sumala sa kasulatan, 4  nga siya gilubong, nga siya nabanhaw sa ikatulo ka adlaw sumala sa kasulatan,     

Si Pablo mihatag kahulugan sa maayong balita nga iyang giwali diha sa 1 Corinto 15:3,4.  Nganong kinahanglanon man nato kaayo ang pagsangyaw sa insaktong Jesus sa atong panahon karon? Si Pablo nagsulti sa mga taga-Korinto diin sila NAKADUNGOG SA MAAYONG BALITA NGADTO KANILA UG NGA KINI ILANG GIDAWAT UG SILA NANAGBARUG NIINI. Mao kining Pablohanong mensahe diin ang mga katawhan karong panahona maluwas ilalum sa dispensasyon sa grasya. Ang maayong balita ni apostol Pablo mao: nga si Kristo namatay sa atong mga sala, gilubong ug nabanhaw pag-usab sa ikatulo ka adlaw sumala sa mga kasulatan. Siguroa nga ikaw naghatag ug insakto nga maayong balita sa mga tawo sa dihang ikaw magasulti ngadto kanila. Kung ikaw magadala ug maayong balita ni Jesus ug magwali sa Iyang gitagnang buluhaton dinhi sa yuta nan ikaw nagwali ug lahi o pinasahe nga maayong balita nga wala mahaom sa programa ilalum sa dispensasyon sa grasya, lahi kana sa usa nga giwali ni Pablo.

Si Pablo nagpanghimatuod nga ang maayong balita nga gikawali ngadto kanila sa paaging si Kristo namatay tungod ug alang sa atong mga kasal-anan. Pila man ka higayon nga atong makaplagan si Jesus nga nagsulti sa Israel nga siya mamatay alang sa ilang mga sala? Zero, walay usa ka bahin diin si Jesus miingon niini ngadto kanila " ang tanang mga butang nga gikasulat pinaagi sa mga propeta mahitungod sa Anak sa tawo pagatumanon." (Lukas 18:31)

Si Pablo nag-ingon nga kita gikahatagan sa buluhaton sa pagpasig-uli (2 Corinto 5:18), dili ang pagpanghimatuod sa Iyang buluhaton dinhi sa yuta ug alang sa yuta. Kini nagpasabut lamang nga aduna gayuy kausaban. Kadtong gibuhat o buluhaton ni Jesus alang sa programa sa yuta temporaryo kadtong gihiklin ug dili nato i-apil kadtong Iyang pagpailang buluhaton sa Israel sa atong langitnong buluhaton nga mao ang pagpasig-uli ilalum sa panahon sa grasya.

Galatia 2:7-9

7  hinonoa, sa ilang pagkakita nga ako gikapiyalan man sa Maayong Balita ngadto sa mga walay sirkunsisyon, maingon nga si Pedro gikapiyalan sa Maayong Balita ngadto sa mga may sirkunsisyon 
8  (kay siya nga nagbuhat pinaagi kang Pedro alang sa pag-alagad ngadto sa mga may sirkunsisyon nagbuhat man usab pinaagi kanako alang sa mga Gentil),
9  ug sa ilang pagkakita sa grasya nga nahatag kanako, si Santiago ug si Cefas ug si Juan, ang mga gipanag-ila ingon nga mga haligi, mitunol kanako ug kang Bernabe sa toong kamot sa pakig-ambitay, aron kami managpangadto sa mga Gentil ug sila ngadto sa mga may sirkunsisyon; 

Si Pedro, Santiago ug Juan nakaila sa nadawat ni Pablo nga bag-ong mensahe, ug sila miuyon sa pagsanong sa ilang buluhaton ngadto sa mga may-sirkunsisyon UG SI PABLO NGADTO SA MGA PAGANO O GENTIL. Si Pablo wala magwali ug maayong balita ngadto sa tinuod nga may-sirkunsisyon; mao kadto sila diin si Pedro, Santiago ug Juan nangadto.

Ang katarungan ngano nga si Santiago, Pedro ug Juan misanong uban kang Pablo sa pagnunot sa ilang buluhaton tungod kay ang pinadayag nga nadawat ni Pablo usa ka bag-ong butang, diin ang DIOS MAGHIMO UG USA KA PINASAHI NGA PAMAAGI. Mao kining katarungan nga sila misanong sa paglimita sa ilang buluhaton ngadto sa mga taga may-sirkunsisyon. Sila nakasabut nga sila dili managpangadto sa tanang mga kanasuran sa samang panahon. Mao kini karon diha sa buluhaton ni Pablo sa pag-adto sa mga pagano uban ang maayong balita nga iya sa walay-sirkunsisyon.

Kadtong ila sa mga may-sirkunsisyon, uban sa mga escriba ug Pariseo, nagsunod-sunod asa siya moadto dayon maligutguton ug nangasuko gayud kaniya uban ang pagdebate ug panaglalis (tinuod kini bisan pa karon nga kadtong mga wala magsunod kang Pablo ug nagtudlo ug sagol mangasuko sa mga nagsunod kang Pablo). Ilang gituis ang maayong balita sa graya sa Dios sa pagsulti sa mga tawo nga aron sila maluwas kinahanglan silang magpasirkunsisyon. Kay alang sa mga tinuod nga Judio, ang sirkunsisyon usa ka tinuod nga maayong balita, apan kana dili usa ka maayong balita nga giwali ni Pablo nga mao ang maayong balita sa walay-sirkunsisyon.

Galatia 1:6-9

6 ¶ Nahibulong ako nga sa kalit mitalikod kamo kaniya nga nagtawag kaninyo sa grasya ni Cristo ug mibalitok kamo ngadto sa laing Maayong Balita--
7  dili nga adunay laing Maayong Balita, kondili nga adunay nanagpagubot kaninyo ug buot magatuis sa Maayong Balita mahitungod kang Cristo.
8  Apan bisan pa kon kami, o usa ba ka manolunda nga gikan sa langit, magawali kaninyog Maayong Balita nga supak sa amo nang gikawali kaninyo, ipatunglo siya.
9  Sumala sa amo nang gikaingon kaniadto, usbon ko karon ang pag-ingon, nga kon adunay magawali kaninyo ug Maayong Balita nga supak sa inyo nang nadawat, ipatunglo siya. 

Ang buot ipasabut ni Pablo nga lahi nga maayong balita mao ang pagdala o paggamit sa maayong balita sa walay-sirkunsisyon ug gidugangan sa maayong balita sa may-sirkunsisyon alang sa pagkinabuhi. Ilang gisagol ang buluhaton ni Jesus sumala sa panagna alang sa programa sa yuta sa Iyang langitnong katuyoan ug buluhaton nga gipiyal ngadto kang Pablo.

Unsa may ikasulti ni Pablo kanato karon? Kasagaran raba karon, sulusama na ang panghitabo sa Galatia ug si Pablo miingon kanila:  

Galatia 3:1-3

1 ¶ O mga Galacianhon nga kulang sa pagsabut! Kinsa bay naglamat kaninyo? Sa atubangan sa inyong mga mata si Jesu-Cristo, sa matin-aw gikapadayag nga linansang sa krus.
2  Kini lamang ang buot ko nga ipangutana kaninyo: Gidawat ba ninyo ang Espiritu tungod sa mga buhat sa pagbantay sa kasugoan, o pinaagi ba sa pagpatalinghug nga inubanan sa pagtoo?
3  Nangahimo na ba gayud diay kamo nga ingon ka kulang sa pagsabut? Nakasugod na man unta kamo sa Espiritu, magpakatapus ba diay kamo karon sa lawas? 

Si Pablo nagtawag kanilang mga boang ug siya nangutana kong kinsay naglamat kanila. Gisultihan sila nga sila WALA MOTUMAN SA KAMATUORAN UG NAGTUO NGA SILA KINAHANGLAN PANG MAGPASIRKUNSISYON ARON MALUWAS. Kini nahitabo tungod kay dunay miadto kanila ug nagdala ug lahi nga maayong balita nga lahi sa nadawat sa mga taga-Galatia. Impluwensya kadto sa maayong balita nga iya sa may-sirkunsisyon. Si Pablo nagwali ug maayong balita sa grasya sa Dios: Si Jesus-Kristo nga ana sa mga langitnong dapit ug kita iyang gipalingkod uban kaniya. Ang mga taga-Galatia nahimong boang tungod kay sila nakasugod na Esperitu apan mibalik ilalum sa kasugoan ingong usa ka pamaaging kaugalingong buhat sa pagkamatarung (sa unod)

Pila man ka porsiento sa mga kaiglesyahan karon nga nagwali pinasikad sa mga binuhatan aron pagakaloy-an ug tagaan ug pabor sa Dios? Mao na ang porsiento sa mga kaiglesyahan nga misumbalik sa sistemang pinaagi sa buhat diin may usa ka paagi nga gisunod sa kanhiayng panahon. Kana dili maoy sistema sa grasya sa atong dispensasyon sa grasya. Daghan ang nagsagol-sagol kang Jesus sa iyang buluhaton dinhi ug alang sa yutan-ong katuyoan itandi sa Jesus nga naghatag ug langitnong buluhaton alang sa langitnong katuyoan. Asa may imong giwali niana? Magpili ka!

Ang maayong balita sa grasya sa Dios mao ang mensahe sa binanhawng Ginoong Jesu-Kristo diha sa Iyang langitnong buluhaton, mao ang paagi sa pagluwas ug paagi sa atong pagkinabuhi karon.

ANG AWHAG: sabta asang bahina nga Jesus nga imong iwali. Kini imo lamang makaplagan kung ikaw magabahin-bahin sa pulong sa kamatuoran, nga mao, ang pagsabut sa mga kalainan tali sa gitagna o panagna ug sa tinago o sekreto.

2 Corinto 5:16 

¶ Busa, sukad karon among mahibaloan ang tawo dili na sumala sa tawhanong pag-ila, ug bisan tuod dihay panahon nga si Cristo among nahibaloan sumala sa tawhanong pag-ila, karon WALA NA kami magaila kaniya sa ingon. 

Ang grasya sa Dios magauban kaninyong tanan