Ang Salamin Sa Kamatuoran Ug Ang Pagkahimong Tinuod Nga Kristohanon Karon sa Grasya

      

ANG PAGKA-KRISTOHANON SA UNOD VS. ANG PAGKA-KRISTOHANON SA ESPERITU
By: Bro Albert Gran


Kung subayon gayud nato ang Kamatuoran sa Bibliya, klaro kaayo nga ang pulong sa Dios nganhi kanatong tanan nga mga tawo diin ang susi sa mga tinago sa Dios nga sa sulod sa taas nga mga katuigan Iyang gitago sa mga anak sa tawo, Iya lamang kining gipadayag ug gipiyal kang apostol Pablo karong panahona sa Grasya ( Eph. 3:1-5; Rom. 16:25, Gal. 1:12).

Ang dugukan sa pagtoo diin naglangkub sa imong langitnong kaluwasan, paglaum, panulundon dili nimo matugkad kung ikaw wala pa makasabut sa tinuod nga paagi diin imong pagabahin-bahinon ang pulong sa Dios (2 Tim. 2:15; 2 Tim. 3:16)  aron ikaw Iyang makaplagan nga usa ka magtatrabaho nga walay igakaulaw, nga sa hustong paagi magabahin-bahin sa pulong sa Kamatuoran.

Sa Kristohanong katilingban, ang usa ka anak sa Dios nga may pagsusi sa Diosnong paagi sa pagdala sa Iyang mga pulong uban sa paggawi niini subay sa putli nga kamatuoran diin gitawag nga Pablohanong pagpamatuod (2 Tim.3:10, Phil. 4:9).

Ang nagasubay sa tinuod nga kristohanong paagi sa pagpanudlo, gawi, paglaum, ug pag-angkon sa panalangin mao kadto sila ang nagasunod sa Pablohanong pinadayag pinaagi kang Kristo isip ulo sa lawas ni Kristo. Mao kini ang pagkahimong tinuod nga Kristohanon niining atong panahon karon (1 Cor. 3:10-15).

Sila nga nagasunod kang Kristo karon mao kadto sila ang nagasunod kang apostol Pablo labot sa haum nga pagpasundayag sa paagi sa Dios niining atong gitawag nga panahon sa grasya (1 Cor. 11:1, 1 Cor. 4:6; Eph. 3;1-2). Kadto bang mga Kristohanon nga nagasunod sa paagi sa mga apostoles sa mga may sirkunsisyon ang mga gitawag nga mga Kristohanon subay sa atong panahon karon?

Sa mga nagatudlo ug sinuwitik uban ang mga pagsambog sa pulong sa Dios diin nagapundar sa ilang mga pundasyon sa duha ka programa sa Dios tali sa propesiya ug tinago, nahitumpawak gihapon sa pagkawalay alamag diha sa Pablohanon nga pagpasundayag sa maayong balita sa tinago nga gipiyal sa Dios alang kanato karon.

Dili nagpasabot nga ang paggamit sa pulong sa Dios sa nanglabayng panahon maoy makapahimo karong Kristohanon sa tawo. Ang pagkahimong tinuod nga kristohanon karon ilalum sa grasya nga maoy tinuod nagasunod kang Kristo mao kadtong wala magatamod sa kahibalo mahitungod kang Kristo diha sa unod kondili kadto sila nga nakaila Kang Kristo diha sa esperitu, ang binanhaw nga kristo diin maoy nagapamatuod sa Kaluwasan kanatong mga Gentil dili pinasikad sa usa ka pinili nga katawhan (Israel) kondili pinaagi sa pagpasundayag sa dakong kadaugan sa kamatayon ni Kristo diin maoy gipahayag sa atong espesyal nga apostol sa mga Gentil nga mao si Pablo (Rom. 11:13).

Kining kamatuorana usa ka Pablohanon nga pagpamatuod nga ang atong mga paghalad ngadto sa Dios iyang madawat unsa man ang imong kolor sa panit bisan Judio ka man o Gentil (Rom. 15:16). Diha lamang sa Pablohanong pagpasundayag ang tinuod nga pagkahimong tinuod nga sumusunod ni kristo niining panahona karon o ang pagkahimong tinuod nga Kristohanon diha sa Esperitu.

Ang pagkahimong Kristohanon sa paaging pagtulun-an ug pag-ila Kang Kristo diha sa unod dili matawag bga tinuod nga pagkasumusunod ni Kristo sa atong pamahon karon. Usa kini ka subo pamalandungon apan usa ka tinuod nga basihanan subay sa pagbahin-bahin sa pulong a kamatuoran sa awhag sa wala na pag-ila kang Kristo sa ingon (diha sa unod) (2 Cor. 5:16).

Subaya pag-ayo ang basihanan sa tubag sa pangutana: "Ngano nga ikaw gitawag ug Kristohanon niining panahona karon? Nahimo ba ikaw nga Kristohanon gumikan sa imong pagbautismo sa tubig, pagbantay sa kalagdaan ug mga kasugoan, paghatag sa ikapulo, pagsulti ug mga dila o gumikan sa imong mga maayong binuhatan? Hingpit ba ang imong pagkatinawag nga Kristohanon subay sa kabubut-on sa laraw sa tinago sa Dios niining panahona sa grasya karon diin Iyang gililong sulod sa hataas kaayo nga panahon ug diin kini gipadayag lamang kang apostol Pablo aron kita karon sa mgatuon ug makabasa niini makasabut kita sa atong bahin ilalum sa programa sa Dios nga gitawag ug tinago?

Tam-is kaayo pamalandungon higala, kung sa lunsay nga paagi imong matugkad ang laraw sa grasya sa Dios nga Iyang gipiyal kanatong mga Gentil. Dili na kinahanglan pa ug pagasambugan sa mga lamas sa kanhiay nga kamatuoran sa milabayng panahon ug mga kapanahonan. Kristohanon ka ba sa unod o Kristohanon ka ba diha sa Espiritu? Mao kini ang duha ka matang sa Kristohanon sa atong katilingban karon. Tam-is ang mga pulong sa mga Kristohanon sa unod tungod kay mohapuhap man kini sa atong tawhanong kinaiyahan apan kung ang kamatuoran ang pagasubayon sakit kini alang sa unodnong tinguha tungod kay modulot gayud kini sa kinahiladmang bahin sa atong pagkatawo ug magausab sa imong unodnong kinaiyahan ngadto sa usa ka bag-ong pagkatawo uban ang Espiritu sa Dios pinaagi sa Iyang pulong nga maoy galamiton sa Dios daw usa ka espada.

Ang pagkahamtong ug pagkatugkad sa tinago sa Dios diha sa usa ka Pablohanong pagpasundayag dako kaayo ug bili niadtong gustong mahimong TINUOD NGA KRISTOHANON KARON. Mao kini sila ang garantisado nga MOADTO SA LANGITNONG DAPIT UG HIMAYA. Mao kini sila ang TINUOD NGA MGA MIEMBRO SA LAWAS NI KRISTO.

Ang mga sekta ug relihiyon diin gitukod ug gimugna sa tawo, dili kana maoy haum busa kana palpak, mini, tawhanong kaugdahan sa pagkahimong miembro diin pagasundon ug himoong sulondan si Kristo diha sa tawhanong pagkaila. Ang lingtungay sa punto de vista nga pagpamatuod mao kini: nga ang mga Kristohanon nga nagsunod ni Kristo diha sa Unod wala pa mahimugso sa PLANO SA DIOS aron sila mahimong tinuod nga Kristohanon diha sa espiritu sanglit halayo kanila ang usa ka bililhong PAGPADAYAG O PAGPASUNDAYAG SA MAAYONG BALITA pinasikad sa PABLOHANONG PAGPAMATUOD.

Ang Grasya Ug Kalinaw sa Dios magauban Kanimo